CAGAYAN DE ORO CITY-Gisaway ni kanhi City Mayor Vicente Emano ang pagbalhin na usab ni City Mayor Oscar ‘Oca’ Moreno sa PDP-Laban gikan sa partido Liberal.
Kini human kabahin si Moreno sa daghang ba-ong miembro sa PDP-Laban nga manumpa sa USTP gym ning syudad karong adlaw’ng Sabado.
Miingon si Emano nga katungod sa PDP-Laban kon kinsa ang ilang mahimong bag-ong mga miembro apan wala magkahulugan nga malimtan na ang mga kaso nga giatubang ni Moreno sa mga hukmanan.
Samtang gi-depensa ni City Mayor Oscar Moreno kon nganong gitalikdan niini ang partido Liberal ug mopasakop na sa PDP-Laban ni Pres Rodrigo Duterte.
Miingon si Moreno nga angay masayran sa katawhan nga mismo si PDP-Laban founder ug kanhi Senate Pres Nene Pimentel Jr ang hinungdan kon nganong nahilig siya sa politika.
Gipasabot ni Moreno nga hinoon nga mas una kini nangalagad sa pribadong sektor ayha hingpit misulod sa kalibutan sa politika.
Nasayran usab nga hilom nagkatagbo si Moreno,kuyog si Cagayan de Oro 1st District Cong Rolando Klarex Uy ug Misamis Oriental 1st District Pedro Unabia ning syudad sa maiging semana.
