CAGAYAN DE ORO CITY – Gika-alarma ni City Mayor Oscar Moreno ang pagsaka sa ihap sa mga tawong positibo sa coronavirus disease ning syudad.
Kini human namatay ang 62 anyos nga ginang tungod sa bayrus nga taga-Macanhan,Brgy Carmen sa syudad.
Apan bisan niini,miingon ang mayor nga dili angay mahadlok ang katawhan aron kalikayan nga mawala sa pokus sa pagsumpo sa local transmission sa bayrus.
Kini na ang ikaduha nga kaso sa bayrus nga natala diha sa Brgy Carmen diin pulos namatay ang natakbuyan nga pasyente.
Samtang ilusad sa grupo ni City Health Office epidiomologist Dr Joselito Retuya ang lapad nga contact tracing sa mga tawo nga ulahi gika-atubang ug gikauban sa pasyente nga namatay tungod sa bayrus sa Brgy Carmen sa syudad.
Miingon si Retuya nga daan nang may gihambin nga balatian ang biktima ayha nagpahiling sa Northern Mindanao Medical Center ug nabugtuan sa kinabuhi niadtong Mayo 15 ning tuiga.
Gani,ubos na sa kuwarantinas ang tulo ka kabanay sa biktima.
Kasamtangang nagbaton na sa siyam ka positibong kaso sa bayrus ang syudad diin lima kanila ang pulos nangamatay.
Dugtong niini,gikordon ang lugar diin dapit nagpuyo ang senior citizen nga namatay tungod sa COVID-19 diha sa sa Macanhan,Brgy Carmen sa syudad.
Gibutyag ni Carmen Brgy Kagawad Sonny Cahayag nga sa ilang inisyal nga pagpanglista, anaa sa 116 ka households ang apektabo.
Miingon si Cahayag nga walay tawong pagawason sa maong lugar gawas lamang niadtong mga padulong sa trabaho.
Hinoon gipasalig sa opisyal nga ilang tunulan sa ayuda ang mga apektadong residente.
