CAGAYAN DE ORO CITY – Gikasakit ni City Mayor Oscar Moreno ang memorandum sa Northern Mindanao Medical Center o NMMC partikular sa internal medicine dept nga naglimit sa ilang health workers nga mosulod sa kabarangayan nga ubos sa local lockdowns.
Kini tungod sa natala nga mga kaso sa local transmission sa COVID-19 sa syudad.
Miingon si Moreno nga wala siya magdahom sa unod sa maong kamanduan apan nagtoo usab kini nga dili intensyon sa NMMC nga dauton ang dakbayan.
Una niini,anaa na sa 16 ka brgy sa syudad ang dunay pagpatuman sa lockdowns tungod sa pagtinakdanay sa pipila ka residente sa bayrus.
Samtang nangayo’g karong pasaylo ang Northern Mindanao Medical Center o NMMC nunot sa alarma nga nahatag sa internal memorandum nga gikan sa ilang Internal Medicine Dept ngadto sa publiko.
Kini human nalatid sa maong memorandum nga gidid-an ang tanang sakop sa maong dept nga modalikyat sa mga lugar nga dunay taas nga risgo sa local transmission sa coronavirus disease sa syudad,Iligan City,Bukidnon ug Lanao del Norte.
Miingon si NMMC liason officer Dr Bernard Rocha nga dunay ‘miscommunication’ nga nahitabo rason nga nahatagan kini sa dili maayong kahulugan.
Giangkon ni Rocha nga dunay komunikasyon nga gipalugwa ang ilang internal dept apan wala kini gitumong aron maghatag alarma sa katawhan.
Dugtong niini,gikompirmar ni City Health Office epidemiologist Dr Joselito Retuya nga anaa sa 12 ka health workers ang natakdan sa COVID-19 ning syudad.
Kini gilakipan sa pipila ka doktor,nurses,pharmacists ug health aides.
Gibutyag ni Retuya nga pipila sa maong health workers ang gikan sa city hospital ug mismo sa Northern Mindanao Medical Center.
Hinoon,pipila kanila ang naka-rekober na sukad nahatagan sa medikasyon batok sa maong bayrus.
