CAGAYAN DE ORO CITY- Gipugngan sa Court of Appeals o CA Mindanao Station Special 22nd Division ang Ombudsman ug DILG pagpatuman sa lima ka dismissal orders batok kang City Mayor Oscar Moreno.
Kini tungod gihapon sa kasong kurapsyon nga gisapaka ni Antonio Nunez Jr diin nagpahigayon sa transaction si Moreno nga wala moagi sa public bidding kaniadto sa Misamis Oriental.
Gibutyag sa iyang abogado nga si Atty Dale Brian Mordeno nga nakakuha sila’g temporary restraining order o TRO tungod kay susamang reklamo lamang ang gibasehan sa Ombudsman nga una nang gipugngan sa CA niadtong bulan sa Hunyo ning tuiga.
Nakasaway ang complainant nga si Antonio Nuniez Jr sa gipakita nga lakang sa justices sa Court of Appeals o CA Mindanao Station nga nagpalugwa sa 60 diyas nga temporary restraining order pabor kang City Mayor Oscar Moreno.
Kini human napakyas na usab ang DILG sa pagpatuman sa dismissal orders sa Ombudsman batok Moreno sa kasong kurapsyon nga gilambigitan sa miaging semana.
Nabalaka si Nunez nga mahurot ang 48 ka kaso nga iyang gipasaka sa Ombudsman batok Moreno nga pulos pugngan sa unlimited TRO gikan sa CA.
Gipanalipdan sa kampo ni Moreno ang CA sa ilang kanunay pagkakuha’g temporary restraining order o TRO batok sa mga dismissal order gikan sa Ombudsman.
Kini human may pipila ka tawo nga nagduda sa kredibilidad sa mga justice nga naghawid sa nagkadaiyang special divisions sa CA.
Gibutyag sa abogado ni Moreno nga si Mordeno nga sobra ka istrikto ang CA nga halos dili na gani sila pasudlon bisan sa ilang pag-follow up lamang sa mga kaso sa mga kliyente niini.
