CAGAYAN DE ORO CITY – Namatikdan ni City Mayor Oscar Moreno ang kakapoy nga gibati ni Pres Rodrigo Duterte sa iyang iyang ika-lima nga State of the Nation Address o SONA sa kauluhan.
Miingon si Moreno nga iya nang gilauman nga kini ang bation sa presidente gumikan sa suliran sa coronavirus disease nga mitakboy sa tibook kalibutan.
Asoy ni Moreno nga kontento siya sa performance ni Duterte ilabina nga nakita niya ang paningkamot niini nga masulbad ang mga problema sa nasud taliwala sa pandemya.
Nasabtan usab sa alkalde sa syudad ang baruganan ni Duterte nga walay mahitabong face to face classes hangtud nga dunay bakuna batok sa bayrus.
Dugtong niini, makigkoordinar siya sa Department of Education aron masabutan kon unsay matabang sa LGU nga mas mapalambo pa ang edukasyon sa syudad ning panahon sa Covid-19 pandemic.
Samtang gihatagan ni Cagayan de Oro Association of Barangay Captains o ABC president Alam Lim sa perpekto nga grado si Pres Rodrigo Duterte sa pagdumala niini sa nasud.
Hinoon giangkon ni Lim nga may kakulangon gihapon sa programa sa pangulo ilabina sa distribution sa Social Amelioration Program.
Apan miingon ang opisyal nga si Duterte lamang ang nahimong presidente sa nasud nga may dakong pagbati sa katawhan kaysa kaugalingon,busa perfect 10 si Duterte alang kaniya.
