CAGAYAN DE ORO CITY – Mihatag katin-awan ang lokal nga kagamhanan sa syudad sa isyu sa pagpalit sa duha ka thermal scanner nga anaa sa P2.4 million pesos ang presyo matag usa.
Gibutyag ni Dr. William Bernardo sa logistics cluster nga susama ang maong scanners sa mga gigamit sa sa terminal ug airport diin kung molabay lamang ang indibidwal ug diretso kini nga ma-scan.
Gidugang pa niini nga dili usab angayang itandi ang presyo sa scanner sa online stores ilabina nga lahi ang kalidad niini ug magamit pa sa dugay nga panahon.
Gipasigarbo usab ni Bernardo nga nagbaton kini sa daghang features diin makahatag kini’g awtomatik nga data in real-time gamit ang internet pinaagi sa facial recognition.
Samtang gidepensa ni City Mayor Oscar Moreno ang kamahal sa duha kathermal scanners nga gamiton isip pag-alkontra sa coronavirus disease o COVID-19 ning syudad.
Kini human nag-viral ang pictures ni Moreno nga naghawid sa Ireland made nga thermal scanners nga nagbalor sa halos 5 milyon pesos.
Miingon si Moreno nga klaro ang motibo sa mga kritiko niini nga gub-on ang katuyuan sa maong kagamitan diin China made ang gipakita aron ipatoo nga dunay overpricing niini.
Namahayag ang mayor nga walay binuang nga gihimo sa grupo ni Bernardo sa logistics cluster sa syudad samtang gipalit kini sa Ireland.
