CAGAYAN DE ORO CITY-Gibarugan sa liderato sa Cagayan de Oro City Police Office o COCPO nga wala sila’y gipaboran nga mga politiko ilabina sa May 2019 midterm elections sa syudad.
Gihimo ni COCPO spokesperson Police Supt Mardi Hortillosa ang katin-awan human akusahi nga gipaboran si City Mayor Oscar Moreno sa gilusad nga unity walk sa mga kandidato sa syudad sa miaging semana.
Miingon si Hortillosa nga dili mahitabo nga paboran nila ang bisan kinsa politiko ilabina nga nagsunod ra usab kini sa kamanduan sa Camp Crame kabahin sa maong kalihukan.
Si Moreno ang natahasan subay sa programa nga mohimo’g pakigpulong nga kusganong gisupak sa iyang mga mahimong kaatbang sa eleksyon ning tuiga.
Samtang,wala namulitika apan nag-sentro sa tumong sa maong kalihukan ang unod-mensahe ni Moreno.
Kini ang katin-awan ni Moreno human akusahi sa mga kontra niya sa politika nga gihataga’g pabor samtang miduyog sa unity walk sa mga kandidato aron ipakita nga malinawon ang dakbayan sa taliabot nga piliay ning tuiga.
Miingon si Moreno nga dili niya kinaiya nga manginlabot sa trabaho sa kapolisan apan gituman lamang niini ang tahas isip mayor ug nahatagan sa obligasyon nga mohatag mensahe sa maong kalihukan.
