CAGAYAN DE ORO CITY – Pamulitika ang nakita nga rason ni City Mayor Oscar Moreno kon nganong gi-kwestyon ni City Councilor Jocelyn “Bebot” Rodriguez ang iyang gipangayo nga P658 million nga supplemental budget aron batukan ang pagkuyanap sa Covid-19 sa syudad.
Si Moreno miingon nga nahibulong siya kon nganong kalit nga nagka-interes sa public funds si Rodriguez.
Nagtoo si Moreno nga misakay sa panahon si Rodriguez sa mga tawong nasuko kaniya gumikan sa corona crisis.
Una nang gipamugos ni Moreno nga adunay proseso nga iyang gisunod sa paggasto sa calamity fund budget ilabina nga gusto niya makaseguro nga mapadulong kini sa priority items.
Samtang hugtanon nga gipanghimakak ni Rodriguez ang akusasyon ni Moreno nga pamulitika ang iyang pag-kwestyon sa gipangayong P658 million nga supplemental budget sa syudad.
Gibutyag ni Rodriguez nga katungod niya nga mangutana kon diin napadulong ang pondo sa syudad ilabina nga dugay nahatag ang relief goods sa mga apektadong residente sa Covid-19.
Gani, gipasalig niini nga mohilom siya kon ugaling matubag ni Moreno ang iyang gipangutana nga Emergency Welfare and Crisis Intervention Fund ug Intelligence Fund.
