CAGAYAN DE ORO CITY- Nalipay si Regional Peace and Order Council o RPOC chairman City Mayor Oscar Moreno human milampos ang iyang gitawag nga “expression of aspiration” aron mabuhian si P02 Anthony Natividad sa Brgy Dominorog,Talakag,Bukidnon.
Si Moreno miingon nga iya lamang kaugalingong inisyatiba ang maong lakang ilabina nga dili magkasinabot ang duha ka panig kon hisgutan ang protocol issues.
Gitin-aw ni Moreno nga dili managsama ang iyang gitawag nga “expression of aspiration” ug Suspension of Military Operation o SOMO.
Sumala ni Moreno nga maggikan sa militar ang issuance sa SOMO sukwahi sa iyang gihimo nga nag-base lamang sa pagsinabtanay sa duha ka panig.
Gikinahanglan lamang nga magmatinud-an ang panig sa mga rebelde ug militar sa ilang gipanumpaan sa iyang atubangan aron molampos ang maong lakang.
Nagpasalamat si Moreno sa suporta nga gihatag sa rebeldeng NPA ug gobyerno kalabot na sa iyang gitawag nga “expression of aspiration” .
Matud ni Moreno nga nahatagan og katumanan ang iyang laraw tungod sa gipakitang suporta sa duha ka panig.
Hisayran nga nakumbinser ni Moreno ang panig sa militar,kapolisan ug CPP-NPA-NDF nga buhian na s Natividad kagahapong adlawa.
