CAGAYAN DE ORO CITY-Isilbi’g balik sa DILG-10 ang dismissal order batok kang City Mayor Oscar Moreno tungod sa kasong administratibo nga gipasaka sa petitioner nga si Engr Antonio Nuñez sa Ombudsman.
Kini kon dili makakuha’g ‘writ of preliminary injunction’ o WPI si Moreno sa Court of Appeals o CA nga magpugong sa DILG sa pagpatuman niini karong adlawa.
Mihupas ang duha ka bulan nga temporary restraining order o TRO ni Moreno gikan sa CA niadtong petsa 27 ning bulana aron dili siya mapapha sa puwesto.
Nagsumikad ang dismissal order batok Moreno tungod sa walay public bidding nga ilang gihimo samtang nag-abang sa heavy equipment sa pagsilbi pa niya nga gobernador sa Misamis Oriental sa tuig 2007 ingon man sa katuigan 2011 hangtod 2012.
Samtang nakaduso na’g court pleadings o hangyo ang kampo ni Moreno aron pangayu-on sa CA Mindanao Station nga subli pungan ang pagpatuman sa dismissal order batok kaniya gikan sa Ombudsman.
Gikompirmar sa chief legal counsel ni Moreno nga si Atty Dale Brian Mordeno nga naghulat na lamang sila sa ruling sa CA justices kon ihatag ba pabor kanila ang WPI batok dismissal order.
Subli,gihimakak sa kampo ni Moreno nga walay kurapsyon sa gisudlan nila nga transaction bisan wala giagi sa public bidding sukwahi sa gipamugos ni Engr Antonio Nuñez.
