CAGAYAN DE ORO CITY – Supak si City Mayor Oscar Moreno nga ipaubos sa ‘ground zero’ ang Sitio Pinikitan,Brgy Camaman-an ning syudad.
Kini bisan kon namatay ang pasyente nga positibo sa coronavirus sa maong brgy sa miaging semana.
Miingon si Moreno nga sayon ra ang pagsulti kabahin sa maong sugyot apan dili kini basta-basta nga ipatuman tungod sa daghang konsiderasyon.
Gipamugos sa mayor nga angay magpuyo sa balay ang mga residente kay aron maminusan ang tsansa nga matakdan sa bayrus.
Samtang nagkasabot ang mga opisyal nga ilang tutukan sa pagbantay diin nagpuyo ang tigulang nga namatay sa COVID-19 sa Sitio Pinikitan,Brgy Camaman-an sa syudad.
Gibutyag ni Camaman-an Brgy Kapitan Pedro Arda nga ilang gipabantayan ang mga entry ug exit point sa maong lugar aron walay makasulod ug makagawas.
Apan giklaro ni Arda nga may exception gihapon diin mahimong mogawas ang mga mopalit sa tambal ug pagkaon basta adunay dala nga brgy exit pass.
