CAGAYAN DE ORO CITY-Napugngan sa laing higayon sa Court of Appeals o CA-Mindanao ang mando sa DILG-10 nga wad-on sa iyang puwesto si Mayor Oscar Moreno ning syudad.
Kini human milugwa ang resolusyon sa CA 22nd Special Division diin naghatag pabor nga ma-consolidate ang ika-24 nga kasong administratibo nga giatubang ni Moreno sa Ombudsman.
Miingon si Moreno nga tungod niini,wala na’y epekto ang mando sa DILG nga gi-silbi batok kaniya aron paphaon kini sa pagka-mayor tungod sa kasong kurapsyon.
Dumduman nga 48 ka counts sa kasong administratibo ug kriminal ang gipasaka sa Ombudsman batok Moreno subay sa reklamo ni Engr Antonio Nuñez gumikan sa govt project implementations nga wala moagi’g public bidding samtang gobernador pa kini sa Misamis Oriental.
Samtang dili na mahinayon nga mohurar pa isip bag-ong mayor si City Vice Mayor Rainer Joaquin ‘Kikang’ Uy isip hulip kang Moreno ning adlawa.
Kini bisan nga unang gibutyag ni DILG regional director Arnel Agabe nga si Uy na ang bag-ong mayor kon subayon ang mando sa Ombudsman nga gisilbi nila batok Moreno sa miaging adlaw’ng Lunes.
Apan giklaro sa media officer ni Uy nga si Fred Dellava nga mosunod sila sa consolidation order nga gilugwa sa CA-Mindanao nga nagpabor sa petition ni Moreno.
Miingon si Dellava nga nagmatood lamang kini nga wala sa interes ni Uy nga hulipan si Moreno bisan sa hukom gikan sa Ombudsman.
Sa pikas bahin,namugos ang testigo sa corruption cases nga giatubang ni Moreno nga lahi nga dismissal order ang gilugwa sa Ombudsman aron kini paphaon sa puwesto.
Miingon si Nuñez nga pagmatood niini nga miduso pa’g sunod-sunod nga motions ang abogado ni Moreno nga si Atty Dale Brian Mordeno sa Court of Appeals o CA-Manila kabahin sa maong mga kaso.
Si Nuñez mipasaka’g kaso kaniadto apan gihimo na lamang testigo ug ang Ombudsman na ang naghawid niini batok Moreno.
Una niini,gibutyag ni Mordeno nga dili na angayang ipatuman pa sa DILG ang dismissal order batok Moreno kay dugay na kining nahatagan sa temporary restraining order sa korte.
Gani,andam usab sila nga moatubang bisan kon dad-on sa Ombudsman didto sa Korte Suprema.
