CAGAYAN DE ORO CITY-Giila nga regalo sa pamilyang Rotoras ang pagkasikop sa architect nga gikonsiderar nga person of interest sa kasong pagpusil-patay kang USTP president Dr Ricardo Rotoras ning syudad.
Kini human unang nasikop si Architect Rey Galua,minyo ug nagpuyo sa Gran Europa,Brgy Lumbia sa syudad kagahapong adlawa.
Miingon ang tigpamaba sa pamilya nga si Eldie Rotoras nga manghinaot sila nga si Galua ang makahatag sa mga impormasyon sa mga otoridad aron matumbok ang mastermind sa kamatayon sa ilang igsoon.
Si Rotoras ang gipusil sa daghang higayon sa duha ka suspek gawas sa iyang pinuy-anan sa Golden Glow Village North Subd,Upper Carmen niadtong Disyembre 2017.
Samtang wala na gikakurat ni City Mayor Oscar Moreno ang pagkasikop dihang gisilbi ang duha ka search warrant of arrest batok kang Galua sa Brgy Lumbia sa syudad.
Miingon si Moreno nga angay ipaubos sa subsob nga imbestigasyon si Galua isip person of interest aron mapamatud-an kon kini may kalabutan sa kaso ni Rotoras.
Una mitanyag si Moreno ingon man ang city council ug grupong Mason sa 2.5 milyon pesos nga reward money aron mapadali ang pagsulbad sa kamatayon ni Rotoras niadtong petsa 2 sa Disyembre 2017.
Samtang kasuhan sa CIDG-10 sa pagbaton sa illegal nga mga armas ug eskplosibo si Galua sa piskalya sa syudad.
Kini human unang nasikop sa PNP joint operations si Galua sa giingong pagbaton sa mga armas ug mga granada sa pagsilbi sa search warrants sa pinuy-anan niini sa Gran Europa ning syudad.
Miingon si CIDG -10 chief investigator SPO4 Noel Oclarit nga ang pagsikop kang Galua subay sa mando sa korte tungod sa paghupot sa dili lisensyadong mga armas.
Giangkon ni Oclarit nga gitratar nila si Galua nga person of interest sa kaso ni Rotoras apan dili isip mastermind sa hitabo.
Nasuta sa PNP nga konektado si Galua sa Wing-An Corporation nga naka-kontrata sa gipahunong ni Rotoras nga construction sa USTP student center kay nadiskobreng may anomaliya.
Samtang nagdumili pagkompirmar ang Cagayan de Oro City Police Office o COCPO kon kabahin si Galua sa gitumbok sa SITG-Rotoras nga usa sa upat ka persons of interest sa kasong pagpatay ni Rotoras.
Kini human gusto ni SITG Rotoras spokesperson C/Insp Mardi Hortillosa nga mahuptan ang mga lig-ong ebedensiya nga molambigit kang Galua ayha mopagawas sa pahayag.
Miingon si Hortillosa nga limitado ang iyang impormasyon gikan sa SITG investigators hinungdan dili una kini makasulti sa posibleng koneksyon ni Galua sa kamatayon ni Rotoras.
