CAGAYAN DE ORO CITY – Miangal na ang lotto operators sa Cagayan de Oro ug Misamis Oriental sa hinay nga kita sa ilang operasyon.
Matud ni Astrid Bana, presidente sa Misamis Oriental-Cagayan de Oro Lotto Agents Association Incorporated o MOCLAAI nga miubos sa 80 hangtud 90 porsento ang ilang kinitaan.
Kini human sila gidid-an sa Philippine Charity Sweepstakes Office o PCSO sa pagbaligya’g Small Town Lottery o STL tickets.
Nabalaka si Bana nga masira ang ilang mga negosyo sunod bulan kon dili maaksiyon ang hangyo kang Pres Rodrigo Duterte nga tugtan sa hangyo nila.
Samtang nagbahad ang lotto operators sa Cagayan de Oro ug Misamis Oriental nga mapugos sila nga mag-martsa sa kadalanan kun ugaling dili dunggon ni Pres Rodrigo Duterte ang ilang hangyo.
Gibutyag ni Bana nga mangayo sila’g tabang sa media ingon man sa mga magbabalaod nga mapaabot kang Duterte ang ilang giduso nga resolusyon sa Philippine Charity Sweepstakes Office o PCSO.
Nahimong apektado ang panginabuhian sa lotto operators dihang gisuspenso ni Duterte ang lotto operations tungod sa kurapsyon. Apan dihang natapos na ang suspensyon, gidid-an sila nga makabaligya’g STL tickets nga dako’g tabang aron maparalisar ang illegal swertres ning syudad ug lalawigan.
