CAGAYAN DE ORO CITY – Gikompirmar ni City Mayor Oscar Moreno nga katulo na kahigayon siya nga nakigtagbo sa hog raisers sa syudad.
Siya miingon nga makanunayon ang iyang komunikasyon sa mga negosyante sa pagseguro nga makalikay sa African Swine Fever o ASF ang ilang mga binuhing baboy.
Miingon si Moreno nga iya usab gipatuman ang pag-ban sa importasyon sa karne sa syudad gikan sa Luzon area aron ma-protehiran ang sektor sa agrikultura ug maseguro ang kredibilidad sa produkto sa kamerkaduhan.
Samtang gideklara sa tibook Misamis Oriental ang “total ban” sa importasyon sa karneng baboy gikan sa Luzon area.
Kini subay sa hangyo sa swine raisers sa kabalaka nga makasulod sa lalawigan ang African Swine Fever o ASF.
Miingon si Provincial Veterinary head Dr Benjie Resma nga nagpaggawas sa Executive order 2019-14 si Misamis Oriental Gov Bambi Emano nga nagmando nga gidili na ang pag-import sa mga karneng baboy nga naggikan sa Luzon.
Dugang ni Resma nga gihimo kini ni Emano aron proteksyonan ang katawhan sa bisan gidid-an ni Department of Agriculture o DA Sec William Dar nga magpatuman sa pag-ban sa hog products ang mga lugar nga dili apektado sa ASF.
