CAGAYAN DE ORO CITY – Imbestigaran sa city council ang Diamond Millennium Corporation o DMC kon nganong pakyas mapugngan ang paglihok sa mga ilegal nga operators sa small town lottery o STL sa dakbayan.
Kini human nabantayan ni City Councilor Eric Salcedo ang grabe nga pagkuyanap sa illegal STL outlets bisan ang DMC ang natahasan sa PCSO sa pagpadagan sa legal nga pagpadula niini sa syudad.
Miingon si Salcedo nga wala siya makadumdom nga miagi sa konseho ang korporasyon aron masuta kon dunay social acceptability niini gikan sa publiko.
Gitaho usab sa maong special report ni Salcedo nga anaa lamang sa 5 milyon pesos ang kinitaan sa DMC ug pipila ka porsiento niini ang masulod sa panudlanan sa dakbayan.
Dugtong niini,gitahasan ni City Vice Mayor Rainer Joaquin Uy ang komitiba sa games and amusement nga tukion ang special report ni Salcedo kabahin sa status sa DMC ning syudad.
Namahayag ang bise-mayor nga gusto niya masuta kon walay nasupak nga mga ordinansa ang DMC bisan kon sila ang gitugtan sa PCSO nga maka-operate sa dakbayan.
Sa pikas bahin,gipasalig usab ni Kag Roger Abaday,chairman sa games and amusement committee nga e-koordinar ang PCSO-Misamis Oriental kabahin niini.
Samtang bukas usab ang Bombo Radyo sa DMC alang sa ilang paghatag katin-awan sa maong isyu.
