CAGAYAN DE ORO CITY – Nagbaton na sa kompirmadong kaso sa pertussis o ‘whooping cough’ ang dakbayan.
Namahayag si City Health Office head Dra. Rachel Daba-Dilla nga gilangkuban kini sa 2-month old nga bata samtang suspected o gidudahan pa ang duha ka 3-month olds nga naghambin sa maong makamatay’ng sakit kon dili madali pag-atiman.
Gitumbok ni Dilla nga daan na nila kining gikahadlukan nga moigo sa dakbayan kay miubos ang ‘herd immunity’ sa katawhan epekto sa pandemya sa COVID-19.
Dugtong niini,giawhag sa CHO ang mga ginikanan nga modalikyat sa brgy health centers alang sa immunization doses.
Dumduman nga ang lugar sa Iloilo,ubos na sila sa state of calamity tungod sa 20 ka kaso sa pertussis.
Samtang gilayong gihangyo ni City Mayor Rolando ‘Klarex’ Uy ang katawhan nga mobalik pagsul-ob sa facemask.
Kini aron dili mapun-an ang kaso sa pertussis nga misugod na pag-igo sa pipila ka bata ning syudad.
Namahayag ang mayor nga hulaton niya ang dinaliang rekomendasyon sa City Health Office aron dunay hiniusang lakang pagsanta sa maong sakit.
Hisayrang sobra 50 ka tuig nang nawala ang maong sakit Pilipinas apan nakurat ang Dept of Health sa subli pagtumaw niini sulod ning tuiga.
