CAGAYAN DE ORO CITY – Naka-full alert status ang puwersa sa Cagayan de Oro City Police Office o COCPO alayon sa pinakaduol nang mga adlaw sa katumanan sa pagpasakit sa Ginoong Hesu Kristo.
Miingon si COCPO City Director Col. Aaron Mandia nga partikular nga hatagan sa dakong puwersa sa kapolisan ang mga tawo nga modasmag sa bukid sa Malasag ug Berhin sa Guadalupe dili aron maniid apan tungod sa pagpamalandong sugod ning adlawa.
Gibutyag ni Mandia nga gisugdan na nila’g pakatag ang ilang puwersa sa maong mga lugar ug ubang bahin sa syudad sugod kaganihang kadlawon.
Samtang walay gihatag nga kumpiyansa si Police Regional Office 10 Director Brig Gen Lawrence Coop sa paghatag seguridad sa tanang bahin sa Northern Mindanao region sulod ning semanaha.
Kini bisan kon walay nasagap nga intel reports nga dunay posibleng mohimo’g pagsabotahe sa mga kalihukan haom sa semana santa.
Gani,miingon ang heneral nga halos 40 porsiento sa puwers sa PRO 10 ang nagkatag sa nagkadaiyang bahin sa rehiyon aron pagsiguro nga walay makahimo’g kagubot samtang hulaton nga matapos ang semana santa.
Samtang abagan usab sa civilian force multipliers gikan sa city govt ang paningkamot sa kapolisan ug militar alang sa pagmintinar sa kahusay’g kalinaw sa syudad.
Kini sa pagsiguro nga mahimong tinud-anay nga balaanon ug puno sa pagpamalandong ang katawhan nga modalikyat sa mga simbahan ingon man sa nagkadaiyang religious sites sa dakbayan.
Miingon si CDRRMD chief Nick Jabagat nga partikular nila tutukan ang dakong du-ot sa katawhan nga mosaka sa bukid sa Malasag sa Brgy Cugman ug Berhin sa Guadalupe nga nahimutang sa mga utlanan sa Brgy Tablon,Agusan ug Balubal ning syudad.
Sa pikas bahin,naka-on stand by force usab ang kapitolyo probinsyal sa Misamis Oriental alayon sa pagtamod ning semanaha santa.
Kini subay sa mando ni Provincial Gov. Peter Unabia ngadto sa PDRRMO,PNP ug 58th IB,Philippine Army alang sa maong kalihukan.
Miingon si Roy Waga,consultant sa Provincial Information Office nga nakatutok usab ang puwersa sa probinsya sa nagkadaiyang pilgrimage sites ingon man sa tugpahanan ug pantalan sa lalawigan.
Mihangyo ang kagamhanang probinsyal sa mga dumudu-ong nga sundon ang mga patakaran nga gipatuman sa matag-LGU aron mas mabulukon ang pagbalaand sa mga mahal nga adlaw ning semanaha.
