CAGAYAN DE ORO CITY – Dismayado ang Cagayan de Oro City Police Office o COCPO sa babayeng pulis nga nadestino sa Carmen Police Station kinsa nadakpan sa entrapment operation tungod sa pagpangilkil.
Miingon si COCPO spokesperson Police Lt. Col. Mardi Hortillosa nga gipalawom pa sa Regional Intelligence Unit o RID-10 ang pag-imbestigar kon kinsa ang kakunsabo ni Patrolwoman Sheryl Lou Licayan sa Recruitment Office sa Camp Alagar hinungdan nga makapasulod siya’g aplikante pagka-pulis ug non-uniform personnel bugti sa salapi.
Gani,giawhag ni Hortillosa ang mga nabiktima sa maong pulis nga magpasaka’g kaso.
Una nang gibutyag ni Hortillosa nga dako ang posibilidad nga matanggal sa serbisyo si Licayan tungod sa illegal niyang binuhatan.Nasayran nga nakuha gikan sa suspek ang balor 3-mil pesos atol sa maong operasyon sulod sa foodchain sa Velez Street ning syudad.
