CAGAYAN DE ORO CITY-Miprangka si COCPO spokesperson Supt Mardi Hortillosa nga hayan mosaka pa ang ihap sa mga mapatay nga suspected drug pushers nga naglihok sa dakbayan.
Kini tungod sa gipakitang mga kaisog sa drug pushers sa panahon nga sila ipaubos sa anti-illega drug operations sa kapolisan.
Gihimong pananglitan ni Hortillosa ang kamatayon sa drug pusher suspect nga si Welmark Maestre dihang giingong misukol sa kapolisan sa Brgy Gusa sa miaging kadlawon.
Namahayag si Hortillosa nga dili unta nila laraw nga mapatay ang mga drug pusher apan kon magpakita pagsukol mapugos usab pag-depensa ang kapolisan sa ilang mga kaugalingon.
Si Maestre ang ikawalo nga suspek nga napatay sa kapolisan gumikan sa giingong pagsukol niini atol sa operasyon sa syudad.
Samtang namugos ang kabanay sa napatay nga drug pusher suspek nga si Welmark Maestre nga wala kini sukad malambigit sa gidiling droga diha sa Brgy Gusa ning syudad.
Kini ang pagpamugos sa igsoon ni Welmark nga si Ramil Maestre sukwahi sa gibutyag sa kapolisan human sa hitabo.
Miingon si Maestre nga construction worker lamang ang iyang igsoon ug wala sukad mosulod sa maong ilegal nga kalihukan.
Dugang ni Maestre nga hinoon,may igsoon usab sila nga nalambigit sa pagbaligya’g gidiling droga apan dugay na kadto nga panahon.
