CAGAYAN DE ORO CITY – Andan dawaton ni kanhi Ozamiz City Police Office commander Lt Col Jovie Espenido ang tanyag nga sunod nga mahimong mangulo sa Cagayan de Oro City Police Office kon maoy sugo sa ilang kadagkuan gikan sa Kampo Krame.
Kini ang reaksyon sa kontrobersyal nga pulis nunot sa pahayag ni incoming City Mayor Rolando’ Klarex’ Uy nga gusto niya mahimong police director si Espenido aron pagmatood nga wala siya nalambigit sa ilegal nga droga sukwahi sa pasangil ni Konsehal Zaldy Ocon kaniya.
Miingon si Espenido kinsa maoy nakabungkag sa suspected Parojinog drug syndicate sa Ozamiz City nga dili niya kinaiya nga maoy mohanyag sa kaugalingon alang sa usa ka posisyon.Hisayrang ulahi nga assignment ni Espenido ang Bacolod City Police Office sa Negros Occidental.
Samtang pabiling tanghaga kang Espenido kon nganong dili siya ang naghawid sa drug cases batok kanila ni suspected druglords Kerwin Espinosa ug kanhi Ozamiz City Councilor Ricardo ‘Ardot’ Parojinog.
Kini bisan nga mismo si Pres Rodrigo Duterte ang nagbutang kaniya sa special assignment aron bungkagon ang dakong illegal drug trade sa Misamis Occidental.
Miingon si Espenido nga kon nahuptan pa niya ang mga kaso nila ni Espinosa ug mga Parojinog,daghang dagkong pangalan unta ang mabulgar nga anaa sa kalihukan sa sindikato.
