CAGAYAN DE ORO CITY-Tinguha karon ni Cagayan de Oro City Police Office o COCPO’ Director Sr Supt Robert Roy Bahian nga mahimong “drug free” ang dakbayan.
Gihimo ni Bahian ang panganti atol sa pormal nga pagdawat niya tahas isip bag-ong hepe sa kapolisan sa syudad kagahapong adlawa.
Ipukos sa PNP ang ilang pagbantay sa druga sa matag barangay.
Samtang pagpalig-on sa moral ug kalidad sa trabaho ang kapolisan ang pukos sa bag-ong milingkod nga city police director ning syudad.
Gibutyag ni Cagayan de Oro City Police Office o COCPO spokesperson C/Insp Mardy Hortillosa nga gusto ni Bahian nga magbaton sa disiplina sa kaugalingon ang matag pulis aron walay matawag nga “police scalawags” sa syudad.
Gawas niini, gusto usab ni Bahian nga mapakita nga epektibo sa ilang pagserbisyo batok kreminalidad ang matag pulis.
Sa pikas bahin,bintaha alang sa syudad ang pagsilbing bag-ong hepe ni Bahian sa syudad.
Pagtoo kini ni Kag Romeo Calizo,chairman sa komite sa police,fire and public safety sa konseho tungod sa abilidad nga anaa kang Bahian.
Si Calizo miingon nga may igong kapas si Bahian tungod kay makalihok siya nga walay pagkataha sa iyang mga sakop ilabina nga wala pa siya sukad naa-assign sa syudad.
Si Calizo ug Bahian ang dungan na-destino sa ilang tagsa-tagsa ka ahensiya didto sa Zamboanga Sibugay sa miaging katuigan.
