CAGAYAN DE ORO CITY- Natagbaw ang mga sakop sa City Council sa tubag ni City Police Dir. S/Supt. Roy Bahi-an sa ilang mga pangutana bahin sa iyang pagdumala sa pamulis sa dakbayan.
Kini human giigsa si Bahian sa sesyon sa konseho sa pagpangulo ni Vice Mayor Kikang Uy.
Matud ni COCPO spokesman C/Insp. Mardy Hortillosa II nga lakip sa gipangutana sa mga konsehal kang Bahian kon unsa ka hugot ang pagbantay sa kapolisan sa kahusay ug kalinaw sa syudad ingon man ang ilang kampaniya batok illegal drugs, illegal gambling ug kreminalidad.
Si Hortillosa miingon nga gikalipay sa konseho ang pag-adaptar ni Bahian sa bag-ong sistema sa pagdumala sa kapolisan sa syudad.
Positibo ang tubag sa City Council sa hangyo ni Bahian nga tabangan ang kapolisan aron mapalambo pa ang ilang pagserbisyo ngadto sa publiko.
Miingon si Hortillosa nga gikinahanglan sa kapolisan ang tabang sa LGU’s aron kini makabaton sa dugang mga armas, bag-ong radio communictions ug mobile patrol.
Giingong andam usab ang city council sa pagtabang sa COCPO aron mapatul-id ang mga daut nga presintohan sa kapolisan dinhi sa dakbayan.
Samtang gidayeg ni Kag. Romeo Calizo ang kaikag ni City Police Dir. Sr/Supt. Roy Bahian nga malimpyohan ang COCPO gikan sa police scalawags.
Naglaum si Calizo, kinsa chairman sa Committee on Police, Fire and Public Safety sa City Council nga molampos ang internal cleansing ni Bahian tungod sa determinasyon nga iyang gipakita.
Gidayeg usab ni Calizo ang bag-ong sistema nga gi-adaptar ni Bahian sa kampaniya batok illegal nga druga, ilegal nga sugal ug kreminalidad.
