(Update) CAGAYAN DE ORO CITY- Ipatawag sa committee on police,fire and public safety sa konseho ang liderato ni PNP regional deputy director for operations head Sr Supt Gerardo Rosales nga officer-in-charge sa Cagayan de Oro City Police Office o COCPO ning semanaha.
Kini tungod sa rido o pagpinatyanay tali sa duha ka grupo sa pamilya pinaagi sa pinusila’y diin tulo ka kinabuhi ang nakalas diha sa Daumar-Yacapin Streets,Cogon market sa syudad sa miaging adlaw’ng Domingo.
Gibutyag sa Bombo Radyo ni Konsehal Romeo Calizo kinsa chairman sa komitiba nga tuyo nila ipa-esplikar si Rosales kon nganong wala gilayong maka-responde aron mapugngan ang pagpusil-patay sa motorcycle in tandem suspects sa manager sa Jabar Marketing nga si Mawi Batuintan alyas Mawi Sulayman,28 anyos nga kasamtangang nagpuyo sa Barangay Bonbon sa syudad apan lumad taga-Marawi City.
Miingon si Calizo nga ipatawag usab niini ang kadagkuan sa Muslim organizations aron hangyoon ang ilang mga kaliwatan nga dili dad-on ang rido dinhi sa syudad.
Una nang gipangayo sa pipila ka konsehales sa syudad nga ipalagpot sa puwesto si Cogon Police Station commander C/Insp Gilbert Rollen tungod sa kapalpakan nga pagsumpo sa kremin sa iyang area of responsibility.
Dumduman nga napatay usab sa mga security escort ni Sulayman ang motorcycle in tandem suspects nga sila si Reymond Villanueva, 24-anyos, taga Ozamiz City ug Bebot Herrra nga police asset sa lima ka police officers nga akusado sa kidnapping case nga nahitabo sa syudad sa Oktubre 2016.
Hisayrang una nang midangop sa Cogon Police Station ang tag-iya sa Jabar Marketing nga si Abdul Racman Jabar aron ipatala ang bahad nga iyang nadawatan gikan sa mga kontra niini sa Marawi City sa miagi pa nga mga bulan.
