CAGAYAN DE ORO CITY-Gipaniguro sa Cagayan de Oro City Police Office o COCPO nga dili na mahimong gatasan sa pipila ka police scalawags o ninja cops ang subli pagpatuman sa double barrel alpha reloaded kontra illegal drugs operation sa dakbayan.
Kini human nagsugod na ang paggukod sa kapolisan pinaagi sa city drug enforcement unit pinanguluhan ni C/Insp Ariel Philip Pontillas sa City Intelligence Unit o CIU sa syudad.
Gibutyag ni COCPO spokesperson C/Insp Mardy Hortillosa nga limitado lamang ang mohimo sa operasyon kontra high value target personalities ug manubag sa oversight committee on may himoon nga pag-abuso sa ilang operasyon.
Samtang gidid-an ni PNP regional deputy director for operations Sr Supt Gerardo Rosales kinsa officer in charge sa Cagayan de Oro City Police Office nga magbuot-buot lamang ang station commanders paglusad sa Oplan Tokhang Version 2 sa dakbayan.
Katuyuan niini nga likayan ang pagpataka ug pag-abusar sa pipila ka pulis pagtudlo sa mga sibilyan nga sila nalambigit sa pagbaligya’g droga ug paggamit hinungdan ipaubos sa Oplan Tokhang 2.
Gibutyag ni Hortillosa nga kuyugan nila ang representante sa relihiyosong sektor,brgy opisyales ug PDEA-10 aron kalikayan ang binuang sa programa sa PNP.
Samtang gi-welcome sa PDEA-10 ang subli pag-aktibo sa PNP sa anti-illegal drugs operations nga kanhi gipaundang ni Pres Rodrigo Duterte sa nasud.
Gibutyag ni PDEA agent Ben Calibre nga makadugang sa paggaan sa ilang trabaho ang gipakusog nga double barrel alpha reloaded sa PNP aron makapukos usab sila sa paglusad sa anti-illegal drugs clearing operation sa kabarangayan sa Amihang Mindanao.
Samtang gihulat karon sa 4th ID,Philippine Army ang gabayan gikan sa ilang higher headquarters nga mahimo nila nga basehan kabahin sa pag-abag sa anti-illegal drugs operation sa PDEA-10.
Kini bisan nga nagpirmahanay na sa kasabutan ang kadagkuan sa AFP ug PNP subay sa mando ni Pres Rodrigo Duterte.
Gibutyag ni 4th ID spokesperson Capt Joe Patrick Martinez nga dili sila mohimo’g basta-basta nga pagkuyog sa operasyon kon walay klaro nga gabayan niini.
Gumikan niini, gusto sa mga kasundaluan nga makita ang naka han-ay nga mekanismo para sa ilang labing tin-aw nga partisipasyon.
