CAGAYAN DE ORO CITY-Kayugot ug naghinobrang kasuko ang gitan-aw nga anggulo sa kapolisan kon nganong gibanhigan sa duha ka suspek ang usa ka doktora diha sa Brgy 35 ning syudad sa miaging gabii.
Pahayag kini sa imbestigador nga si SPO1 Neil Apollo de las Alas sa Cogon Police Station dihang nakalinggawas ang biktima nga si Dra Zaynab Abejuela batok sa mga motorcycle in tandem suspects nga nagtinguha sa kinabuhi niini.
Hinoon,luwas na ang biktima human makuha ang bala sa dughan niini gikan sa kalibre 357.
Una niini,gilayong gi-depensa ni C/Insp Mardy Hortillosa,tigpamaba sa Cagayan de Oro City Police Office kon nganong nakalusot ang pagpusil sa mga suspek sa biktima samtang sakay kini sa sakyanan gikan sa pribadong ospital ning syudad sa miaging gabii.
Giawhag sa kapolisan ang medical sector nga magma-ampingon sa ilang mga lakaw sa bisan asa dinhi sa syudad.
Gihimo ni Hortillosa ang hangyo tungod sa kasong pagpamusil sa doktor diha sa Brgy 35 ning syudad sa miaging gabii.
Giangkon ni Hortillosa nga adunay epekto sa medical sector ang pagkapusili ni Abejuela sa duha ka suspek sa maong dapit.
Naghangyo si Hortillosa nga angay mismo usab ang katawhan mohatag sa seguridad sa ilang kaugalingon kay dili sa tanang panahon maka-responde ug makabantay ang kapolisan sa bisan asa nga suok ning syudad.
