CAGAYAN DE ORO CITY-Gihimakak sa Cagayan de Oro City Police Office o COCPO nga gahimo sila’g mga pagpangbutang sa mga ebedensiya sa oras nga molusad sa anti-illegal drug buy bust operation batok sa suspected drug pushers ug users sa syudad.
Gihimo ni COCPO spokesperson C/Insp Mardy Hortillosa II ang katin-awan tungod sa isyu nga planted evidence ang nakuha sa Agora Police Station gikan sa tulo ka drug pushers nga nasikop atubangan sa Bombo Radyo kagahapon sa kadlawon.
Si Hortillosa miingon nga wala kanila ang mga butang nga gipasangil sa mga dinakpan kay dili gusto sa ilang kadagkuan nga makalapas usab sa tawhanong katungod.
Nasikop sa maong operasyon ang target nga si Ramil Ilago nga taga- Brgy Macasandig sa syudad;Lito Andam nga taga-Bukidnon ug Clyde Capinpuyan nga taga-Brgy Bugo diin sila nakuhaa’g balor 100-mil pesos nga shabu ug kalibre 45 nga armas sulod sa mobile drug den.
Samtang gikalipay ni Divisoria Police Station commander Sr/Insp Maricris Mulat nga nasikop sa tropa sa Agora Police Station si Ilago kuyog ang laing 2 ka suspected drug pushers sulod sa passenger van atubangan sa Bombo Radyo kagahapong adlawa.
Si Mulat miingon nga si Ilago ang anaa usab sa ilang listahan ug kauban sa una nilang nasikop na si Nobaisa Tanggo nga nakuhaa’g 260 gramos sa shabu sa Brgy Bulua sa syudad niadtong Marso ning tuiga.
Gani,nasikop usab ang laing kauban ni Nobaisa ug llago nga si Shapia Ampuan sa Brgy 33 sa Brgy Lapasan sa syudad kagabii.
Nakuha gikan kang Ampuan ang balor P30-mil nga balor sa shabu.
