CAGAYAN DE ORO CITY-Giakusahan karon sa simbahang Katoliko nga may bugti nga financial allotment ang gihimo nga pagpabor sa 217 ka kongresista diin 11 niini ang gikan dinhi sa rehiyon 10.
Gibutyag ni Msgr Perceus Cabunoc,vicar general sa Archdiocese sa Cagayan de Oro nga wala na sila makurat sa baruganan sa maong mga magbabalaod kabahin sa kagustuhan balaodnon ni Pres Rodrigo Duterte.
Sa pagkakaron, wala pay pormal nga pahayag o pastoral letter nga gipalugwa ang CBCP diin ang kaparian usab sa syudad ang magtigom kabahin niini sunod semana.
Ang pagka-inotil sa gobierno nga pagsulbad sa kurapsyon ang hinungdan kon nganong nagsaka ang dagkong kremin sa nasud.
Kini ang hinungdan nga angay ipasulbad sa kagamhanan ang isyu sa kurapsyon ug dili mosandig sa silot-kamatayon batok sa mga nakahimo niini.
Reaksyon kini ni Citizens Watch for Good Governance o CWGG convenor Atty Antonio Soriano nunot sa pagpasar sa balaodnon sa death penalty sa kamarabaha.
Si Soriano miingon nga dili tubag sa crime reduction ang pagpatay sa tawong makasasala.
Gawas niini, mahimong questionon sa United Nations ang Pilipinas tungod sa kay nakasupak kini gisudlang kasabutan sa Pilipinas sa miaging katuigan.
Samtang gikastigo sa grupong Kabataan Partylist Northern Mindanao ang mga magbabalaod nga mipabor sa silot kamatayon.
Gibutyag ni Kabataan Partylist Northern Mindanao Sec Gen Vennel Chemfoo nga nagpakita lamang kini nga diktador nga klase sa pagka-opisyal si Pres Rodrigo Duterte.
Nagtoo usab si Chemfoo nga nga kaugalingong interes lamang sa mga magbabalaod kon nganong gisuportahan nila ang silot kamatayon.
Samtang gibarugan karon ni Cagayan de Oro 2nd District Cong Maxi Rodriguez Jr nga basi sa iyang konsensiya ug dili tungod sa kuwarta ang pagpabor niya sa balaodnon sa subli pagpatuman sa silot-kamatayon dinhi sa nasud.
Kini human milugwa ang report nga gi-presyur sila sa mga alyado ni Pres Rodrigo Duterte aron paboran ang balaodnon atol sa 3rd and final reading sa miaging gabii.
Gibutyag ni Rodriguez nga naghinobra ra usab ang reaction sa mga grupo nga supak sa balaodnon diin mapahamtang lamang ang silot-kamatayon ug silot nga life sentence batok sa konbiktado nga nagpagyuhot sa droga subay sa hukom sa korte.
