CAGAYAN DE ORO CITY – Dili maka-diktar ang puwersa sa politika sulod sa kamarabaha apan pinasubay sa legalidad ang basehan ni Cong Rufus Rodriguez sa distrito dos ning syudad kabahin sa impeachment complaint nga atubangon ni Bise-Presidente Sara Duterte.
Kini bisan kon sugo sa Malakanyang ang pagpalagpot sa katungdanan ni VP Sara pinaagi sa liderato ni Speaker Martin Romualdez.
Miingon si Rodriguez nga tinood nga politika ang maong lakang apan isip abogado, mas mosunod kini sa mga ebedensiya nga suportado sa balaod ug mga hukom sa korte suprema.
Dumduman nga gitakdang ihiusa ang duha ka impeachment complaints nga giduso sa magkalahing grupo sa kamarabaha ayha kini tukion sa komitiba sa hustisya ni Negros Occidental 4th District Rep. Juliet Marie “Yoyette” Ferrer.
Dugtong niini,dili igsapayan ni Rodriguez nga hukasan siya sa iyang gihuptang komitiba mapadayag lamang ang tinud-anay nga hukom batok sa impeachment complaint nga giatubang ni VP Sara.
Kini ilabina nga ilado ang liderato sa kamarabaha nga tangtangan ang ubang mga kongresista sa committee chairmanship ug membership kon magsupak-supak sa kagustuhan nga ipahimo kanila.
Miingon si Rodriguez nga sakop siya sa mayoriya apan wala nagpasabot nga e-sakripisyo niini ang iyang lapad nga kahibalo sa balaod isip beteranong abogado tungod lang sa political decision batok Inday Sara nga susama kaniya nga taga-Mindanao.
