CAGAYAN DE ORO CITY – Mohimo sa imbestigasyon ang City Local Environment and Natural Resources Office o CLENRO aron masuta kon nagpasagad ba ang mga opisyales sa Brgy Tuburan kabahin sa illegal mining operation nga hinimuan sa pipila ka Chinese nationals sa utlanang bahin sa syudad ug lungsod sa Opol,Misamis Oriental.
![](https://img.bomboradyo.com/cdo/2024/02/1-4.jpg)
Kini human nakompiskar sa Task Force Kinaiyahan ang backhoe,payloader,dumptruck ug ubang illegal mining equipment nga nakaparada sa quarry site nga dunay permiso usab gikan dinhi sa syudad.
Miingon si CLENRO manager Engr Armen Cuenca nga imposible nga wala masayod ang Tuburan brgy officials kabahin sa pagsulod-gawas sa illegal mining operators sanglit nagsilbing entrance ug exit area ang ilang lokasyon ayha makasulod sa Brgy Tangalan,Opol diin nasapon ang illegal mining site.
Hinoon,mga ekipo lang sa gitoohang illegal gold mining operation ang nabawi sa Task Force Kinaiyahan ug gikustodiya kini sa kapolisan sa Opol ning lalawigan.
Sa miaging Enero ning tuiga,nabulgar usab ang illegal mining activities nga naglihok sa Brgy Tumpagon diin giingong gipasagdan gihapon sa hingtungdang mga opisyal sa gobierno.
Hisayrang atol sa Tuburan-Opol operation,kuyog usab ang PENRO-MisOr,National Bureau of Investigation 10 ug ubang mga sakop sa Task Force Kinaiyahan.