CAGAYAN DE ORO CITY – Giuyunan sa mayoriya sa konseho ang lakang ang sugyot ni Kag Lordan Suan nga mohimo sila’g imbestigasyon batok kang SK Federation Pres Kag John Michael Seno ning syudad.
Kini tungod sa reklamo sa usa ka university scholar nga babaye nga gihanyagan ni Seno nga giingong law-ay nga actuation o taras pinaagi sa FACEBOOK messenger sa miaging Marso 26 ning tuiga.
Gibutyag ni Suan nga angay nga ma-imbestigaran kini sa partikular nga komitiba aron masayran ang kamatuoran ug malimpyohan ang namantsahan nga dungog sa konseho sa dakbayan.
Samtang kusganong gihimkakak ni Seno ang pasangil sa usa ka batan-ong babaye nga kolehiyala nga siya nanghagat o nangayo’g sexual favor ngadto niini via social media sa miaging Marso ning tuiga.
Namugos si Seno nga dili tinood ang maong pasangil kay wala usab daw siya kaila sa maong babaye nga midangop sa PNP aron siya ma-blotter ning syudad.
Misumpay si Seno nga kon motuki na lamang sa code of ethics sa usa ka govt official,angay masusi usab ang job orders nga gihuptan ni Suan kinsa nagsilbing oposisyon diha sa city council.
Una niini,gisaysay eksklusibo dinhi sa Bombo Radyo ni alyas Ivy nga magkaila sila ni Seno tungod kay nagsilbi usab kini nga youth leader apan dismayado kay giingong gihimuan sa linaw-ay nga binuhatan.
