CAGAYAN DE ORO CITY – Gipamugos ni Cagayan de Oro 2nd District Rep. Rufus Rodriguez nga angayan lamang nga i-oktaba ang Brgy ug SK elections sunod tuig.
Gibutyag ni Rodriguez nga wala sukad mahitabo sa kasaysayan sa nasud nga mo-serbisyo lamang sa duha ka tuig ang usa ka brgy opisyal.
Dugtong niini, giawhag ni Rodriguez ang mga naglaraw nga magpapili sa sunod piliay nga hulaton ang eleksyon sa Mayo 2023.
Asoy niini nga mas maayo nga hatagan sa panahon ang kasamtangang opisyales sa brgy nga makahimo’g daghang programa ug makaserbisyo sa katawhan.
Samtang supak ang Barog Kabataan Movement sa sugyot nga i-oktaba ang Brgy ug SK elections sunod tuig.
Apan gitin-aw ni Barog Kabataan Movement convenor Kenneth Piloton nga wala sila’y mahimo kon kagustuhan kini sa mga magbabalaod sa kongreso.
Gani, gibutyag ni Piloton nga dili na sila moduso’g resolusyon nga supakon kini nga sugyot tungod kay nakita nila nga determinado ang mga magbabalaod nga i-oktaba ang 2020 brgy ug SK elections.
Gihagit na lamang ni Piloton ang mga opisyal nga palamboon ang ilang serbisyo sa katawhan.
Dugtong usab niini,pangamdaman pa gihapon sa Comelec ang 2020 brgy ug SK elections sa nasud.
Kini bisan nga dako na’g posibilidad nga masibog ang piliay sa brgy nga gihingusgan sa Kongreso.
Miingon si City Election Officer Atty. Ramil Acol nga bugtong ang balaod lamang ang makapaundang sa ilang gihimong pagpangandam.
Una niini,gitapos na usab sa Comelec ang gihimo nila nga pagdawat sa mga rehistro sa bag-ong mga botante alang sa umaabot 2022 presidential elections sa nasud.
