CAGAYAN DE ORO CITY-Naglaum si Cagayan de Oro City 2nd District Representative Maximo Rodriguez nga dili mabiya sa mga programa sa gobyerno ang Mindanao ilabina nga nahulipan na sa pwesto si House Speaker Pantaleon Alvarez.
Matud ni Rodriguez nga pabor unta sa Mindanao ang pagkatudlo ni Alvarez isip lider sa kamarabaha kung hisgutan ang mga programa.
Apan, dako ang iyang pagtoo nga mahimong patas si bag-ong House Speaker Gloria Macapagal-Arroyo sa paghatag prayoridad sa mga programa alang sa kalambuan sa matag lugar.
Samtang nanghinaut si City Mayor Oscar Moreno nga dili na subli pang mahitabo ang tensyon sa kamarabaha kagahapong adlawa.
Kini human nakasaway si Moreno sa kalit nga pagpapha sa pwesto ni House Speaker Pantaleon Alvarez.
Gitawag ni Moreno nga ‘improper’ ang gihimo sa mga kongresista diin gitunong pa nila sa SONA ni Duterte ang kontrobersyal nga pagpapha sa pwesto kang Alvarez ug ang kalit nga paghulip ni Pampanga Rep Gloria Macapagal Arroyo.
Siya miingon nga daghan pa ang igong panahon aron paphaon sa pwesto si Alvarez isip lider sa kamarabaha.
