CAGYAN DE ORO CITY-Gihupay nila ni Cagayan de Oro 1st District Cong Rolando Klarex Uy ug 2nd District Rep Maxi Rodriguez ang kahadlok sa publiko kabahin sa gilugwayan nga martial law sa Mindanao.
Kini human kabahin si Uy ug Rodriguez sa 240 ka magbabalaod sa kongreso nga mihatag pagtugot kang Pres Rodrigo Duterte sa martial law extension sa Mindanao.
Miingon si Uy nga angay lamang mamintinar sa militar ug kapolisan ang hugot nga seguridad aron dili masubli ang pag-atake sa mga terorista sa Marawi City.
Samtang namugos si Rodriguez nga gihatag usab nila ang ilang suporta kay gikalipay kini sa taga-Mindanao.
Gihimo niini nga pananglitan ang dakbayan,diin mi-ubos pag-ayo ang kreminalidad tungod sa martial law.
Samtang gikalipay sa kadaghanan sa mga Maranao-Muslim nga nalugwayan ang martial law sa Mindanao.
Gibutyag ni ARMM assemblyman Zia Alonto Adiong nga ensakto ang gihimo ni Pres Rodrigo Duterte ilabina nga lig-on nga alyansa ang nahuptan sa mga terorista nga anaa sa Mindanao gikan sa foreign terrorists sa Middle East ug Asya.
Miingon si Adiong nga mismo sila ang nakasaksi sa kabangis sama sa grupong Maute-ISIS nga miguba sa Marawi City pinaagi sa pakig-engkuwentro sa militar sulod sa lima ka bulan.
Sa pikas bahin,angayan tahuron sa publiko ang nakab-ot nga hukom ni Duterte sa extension sa martial law nga gihatagan usab suporta sa kongreso.
Kini ang apelar ni Citizens Watch for Good Governance convenor Atty Antonio Soriano nga unang supak unta niini.
Gipasabot ni Soriano nga kabahin sa demokrasya ang pag-usa ni Duterte ug kongreso sa maong isyu apan mahimo gihapon kining dad-on nga legal challenge sa korte suprema.
Gihagit ni Soriano ang mga pulis ug sundalo nga dili mag-abusar sa pagpatuman sa gihatag kanila nga trabaho.
Dugtong usab niini,gipanganti sa grupong Bayan Northern Mindanao nga mahimong duguon alang kanila ang laing usa ka tuig nga pagdeklarar sa batas-militar sa Mindanao.
Gibutyag ni Bayan Northern Mindanao Sec Gen Wildon Barros gilauman na nila nga pagsaka pa sa mga pagsupak sa tawhanong katungod gumikan sa kagustuhan sa gobierno.
Namugos usab kini nga kasupakan sa konstitusyon ang gihimo ni Pres Duterte nga giuyunan lamang sa 240 ka magbabalaod sa kongreso.
