CAGAYAN DE ORO CITY – Subli nahiagom sa pagbaha ang pipila ka bahin sa syudad epekto sa kusog nga paghapak sa hangin nga adunay kuyog nga mga pag-ulan.
Gikompirmar ni City Disaster Risk Reduction and Management Deparment/CDRRMD head Nick Jabagat nga nakasinati sa street flooding ang porsyon sa syudad partikular ang pagsaka sa tubig-baha sa Bigaan River gumikan sa kusog nga pag-ulan sa Bukidnon kagahapon sa hapon.
Siya miingon nga hinoon walay mga kabalayan nga naanod o nasudlan sa baha apan nakaabot kanila ang impormasyon nga adunay taxi nga gibanlas sa Brgy Gusa.
Sa pagkutlo ning balita, nakit-an na ang taxi sa banda na sa Brgy Cugman diin naghinobra ang pagka-guba ug gitoohan nga lisod nang mapuslan sa pagbalik.
Wala pa’y komento ang tag-iya sa maong taxi.
