CAGAYAN DE ORO CITY- Gipasalig sa task force ang patas nga imbestigasyon sa isyu sa sanitary landfill nga giingong tinubdan sa kontaminasyon sa suba diha sa Brgy San Simon ning syudad.
Kini human natahasan ang task force nga sutaon ang tinud-anay nga hinungdan sa pasangil nga nagsakit ang 30 ka residente dihang naligo sa suba nga nasagulan sa ‘duga’ gikan sa landfill sa Brgy Pagalungan sa dakbayan.
Miingon si Kag Suzette Magtajas-Daba nga ipatawag niya ang naglangkob sa task force aron masugdan ang mga plano kabahin sa pagsusi sa landfill ug Iponan river.
Samtang gikalipay sa City Local Environment and Resources Office o CLENRO ang katukuran sa task force nga mo-imbestigar sa kontrobersya sa sanitary landfill sa syudad.
Gibutyag ni CLENRO officer Edwin Dael nga kumpiyansa sila nga makab-ot sa task force ang patas nga resulta sa imbestigasyon kabahin sa pasangil sa mga opisyal sa Brgy San Simon sa dakbayan.
Una nang namugos si Dael nga may presensiya sa bakterya ang river surface padulong sa Iponan apan giingong anaa lamang kini sa normal nga kalidad.
