CAGAYAN DE ORO CITY – Gipaubos na ni City Mayor Oscar Moreno sa community quarantine ang syudad sugod karong adlawa.Kini isip kabahin sa preventive measure aron mapugngan ang pagkatag sa coronavirus disease o COVID-19.
Miingon si Moreno nga nalatid sa iyang gipagawas nga kamanduan nga mohimo usab sa community quarantine ang Misamis Oriental ingon man ang kalungsuran sa Manolo Fortich, Malitbog, Libona, Baungon ug Talakag sa Bukidnon.
Dugang ni Moreno nga iyang gisugyot ang joint quarantine ug personal nga mihangyo sa political leaders aron mahiusa ang road checkpoints.
Dugtong niini, gilauman nga magtagbo ang mga local chief executives karong adlawa aron sabutan ang mga operational guidelines.
Samtang dili problema kang Gov Bambi Emano ang hangyo ni Moreno nga dungan sila mopatuman sa community quarantine batok sa coronavirus disease diin nakataya ang seguridad sa katawhan sa syudad ug lalawigan.
Miingon si Emano suportado niya ang kagustuhan ni Moreno kay nagtumong kini sa ikaayo sa katawhan.
Apan giklaro sa gobernador nga gusto una niya maandam ang tanang panginahanglanon sa lalawigan ayha mohimo’g home quarantine ilabina nga nagkinahanglan kini sa dakong pondo nga magamit sa mga tawo nga mohimo sa maong gimbuhaton.
Kabahin sa gusto ni Emano nga maandam ang pagkaon ug ubang panginahanglan sa ilang katawhan sa probinsya samtang ipatuman ang kuwarantinas batok sa maong sakit.
