CAGAYAN DE ORO CITY – Sulayan pa’g salbar sa panig sa Cagayan de Oro Water District ug Cagayan de Oro Bulk Water Incorporated o COWD-COBI ang bahad paghunong suplay sa tubig sa westeng bahin sa dakbayan sulod ning adlawa.
Kini human miabot na ang mismong adlaw diin gihatag nga ultimatum sa COBI nga bayran sa COWD ang halos tunga-bilyones pesos nga bayrunon aron dili mahumong ang pagsuplay sa tubig.
Apan namahayag si COWD board of director Gerry Caño,chairman sa negotiating team sa city hall task force nga gusto nila itagbo ang COBI officials aron makakab-ot sa kompromisong kasabutan.
Namahayag si Caño nga maglisod sila’g bayad sa demanda kay dunay bikil sa kontrata nga unang nasabutan tali sa COWD ug kompanyang Metro Pacific Water diin naporma ang COBI.
Samtang andam isibog sa COBI ang ilang hukom nga undangan una na ang pagsuplay sa COWD kon mosaad sila nga bayran ang legal ug subay sa kontrata nga minilyong kontrata niini sa gisudlan nila nga transaksyon sa panubig sa dakbayan.
Kini samtang gibutyag ni Metro Pacific Waters senior legal counsel Atty Roberto Rodrigo nga tinguha nila ikatagbo sa laing higayon ang COWD officials aron makakab-ot sa sulbad sa problema.
Apan namahayag usab si Rodrigo nga kon pabiling tig-a ang COWD sa ilang obligasyon,wala na’y mahimo ang COBI gawas sa paghunong una sa suplay sa tubig.
Samtang dili angay magpailad ang katawhan sa gisaad sa kompanyang Rio Verde nga gihataga’g pabor sa city hall aron makabaligya’g tubig sa 16 pesos per cubic meter sa COWD.
Pasidaan kini ni kanhi City Mayor Oscar Moreno nunot sa tumong sa grupo ni incumbent City Mayor Rolando ‘Klarex’ Uy nga pagsipa sa COBI aron solo na nga water supplier ni COWD ang Rio Verde.
Namahayag si Moreno nga angay iundang na pundok ni Klarex ang pagpatoo nga dapig sila sa katawhan kay ang tinud-anay ang city hall officials ang tinud-anay nga personal interes sa pagkuraw sa COWD-COBI water contract sa dakbayan.
