CAGAYAN DE ORO CITY – Misaka na ngadto sa pito ka tawo ang namatay tungod sa coronavirus disease dinhi sa syudad.
Kini human natala ang ika-14 nga local transmission sa maong bayrus diin usa ka 75 anyos nga babaye ang namatay nga residente diha sa Brgy Lumbia ning dakbayan.
Miingon si city epidemiologist Dr Joselito Retuya nga walay sukad naka-biyahe ang biktima apan gadawat sa mga bisita nga taga-Lanao del Sur ayha nakasinati sa bayrus sa miaging Hulyo ning tuiga.
Unang gidala sa pribadong ospital ang nagsilbing ika-165 nga positibong kaso sa bayrus sa syudad ayha gisulod sa Northern Mindanao Medical Center diin nabugtuan sa kinabuhi sa miaging adlaw.
Samtang gikasubo ni Dept of Health 10 Director Adriano Suba-an ang sunod-sunod nga local transmission sa coronavirus disease sa pipila ka bahin sa rehiyon.
Kini human unang gikompirmar ni Suba-an ang kamatayon sa ika-165 nga pasyente nga positibo ning syudad ug laing walo nga naka-isolate nga gilangkuban sa lima ka health workers sa Iligan City Health Office ug tulo usab ka residente sa Balingasag,Misamis Oriental.
Sa kasamtangan,nagbaton na ang rehiyon sa 606 ka kompimadong kaso sa bayrus nga giapilan sa bag-ong nadugang nga unom gikan sa syudad,lima sa Iligan City;23 ka locally stranded individuals samtang usa ka returning OFW.
Dugtong niini,naka-lockdown na ang upat ka brgy nga nadalikyatan sa lima ka health workers nga natakdan sa coronavirus disease sa Iligan City.
Miingon si Iligan City govt information officer Joe Pantoja nga tungod kini sa mga tawo nga naduulan sa maong mga pasyente ilabina nga nakahimo usab sila sa anti-polio vaccination sa miaging semana.
Miingon si Pantoja nga kabahin sa mga brgy nga gipaubos sa lockdown ang kabarangay sa Pala-o,Villaverde,Brgy Tomas Cabili ug Ubaldo Laya.
