CAGAYAN DE ORO CITY – Gihupay ni City Mayor Oscar Moreno ang kabalaka sa publiko nunot sa impormasyon nga giingong dunay ipatuman nga pag-lockdown sa syudad tungod sa nagtaas nga local transmission sa COVID-19 sunod semana.
Miingon si Moreno nga mahitabo lamang kini nga lakang kon magpasagad ang katawhan sa minimum public health standards rason nga dili na ma-kontrol sa gobierno ang transmisyon sa bayrus.
Giklaro sa mayor nga kon gusto sa katawhan nga dili ipatuman sa IATF ang lockdown angay sila mokooperar sa mga lakang kontra COVID-19.
Sa pikas bahin,dili basta-basta mapatuman ang paghikaw sa katawhan nga moduaw sa ilang mga mahal sa kinabuhi nga mipanaw na ug nalubong sa nagkadaiyang menteryo ning syudad.
Kini human unang gilaraw sa IATF-national nga did-an ang publiko makasulod aron makaduaw sa mga minatay sa mga menteryo sa Nob 1 ug 2 isip pagpugong sa local transmission sa COVID-19.
Miingon sa Bombo Radyo si Moreno nga nahisgutan na kini nila kaniadto apan wala pa’y pinal nga hukom nga nakab-ot kabahin niini.
Gibutyag sa mayor nga hulaton usab niini ang hukom sa kauluhan ug mga gabayan nga angay sundon ilabina nga kustombre na sa katawhan ang paghimo niini.
