CAGAYAN DE ORO CITY-Gikulang na ang taxi units nga naghatag serbisyo sa mga pasahero dinhi sa syudad. Namugos si CAFETADA Federation Pres Bernie Jamaca nga angay matugutan sila sa konseho sa syudad ug LTFRB-10 nga madugangan sa 300 ka tax units aron matubag ang pagpanginahanglan sa mga pasahero sa syudad.
Gihimo ni Jamaca ang apelasyon atol sa komite hearing nga gipatawag ni Kag Teodolfo Bong Lao sa konseho sa syudad kagahapong adlawa.Samtang ipa-imbestigar sa konseho sa Roads and Traffic Administration o RTA ang giingong pagkulang na sa taxi units dinhi sa syudad.
Miingon si Konsehal Teodulfo Bong Lao kinsa chairman sa public utility committee sa konseho nga tuyo masuta sa syudad ang actual nagdagan nga taxi units ayha sila motugot sa kagustuhan sa CAFETADA.
Una nang nasuta nga nagbaton ang tibuok syudad sa 2-mil 366 ka taxi units diin ang 140 niini ang nadaot human maigo sa pagbaha niadtong Enero 16 ning tuiga.
