CAGAYAN DE ORO CITY-Giisa sa Police Regional Office -10 ang pinakataas nga alerto sa tibook pwersa sa kapulisan sa tibook Northern Mindanao. Kini tungod sa sunod sunod nga pagpamomba nga natigayon sa Mt Carmel cathedral sa Jolo Sulu ug mosque sa Zamboanga City.
Si PR0-10 spokesperson Police Supt Surki Serenias miingon nga hugot nga checkpoint ang ilang gipatuman sa Lanao areas ingon man sa tanang entry ug exit points sa rehiyon.
Una nang gikumpirmar ni Serenias nga target ang Cagayan de Oro, Davao ug General Santos City nga bombahan sa mga teroristang grupo subay sa intelligence report.
Samtang gipatuman sa Cagayan de Oro City Police Office o COCPO ang hugot nga checkpoint ug police visibility sa syudad.
Kini may kalabutan sa intelligence report nga usa ang Cagayan de Oro nga target sa mga teroristang grupo nga bombahan.
Sumala ni COCPO spokesperson Police Supt Mardi Hortillosa nga dugay na nilang nadawatan ang maong report hinungdan nga ilang gipahugtan ang seguridad sa mga simbahan ingon man sa mga lugar nga sagad dagsaan sa tawo.
Nanawagan usab si Hortillosa sa publiko nga magmakalmahon ug dili mag-panic sa maong report.
