CAGAYAN DE ORO CITY – Andam si City Mayor Oscar Moreno nga tas-an ang quarantine status sa syudad kon hingpit nang dili makaya ang pagsaka sa local transmission sa COVID-19 sa dakbayan.
Kini ang tubag ni Moreno nunot sa sugyot sa grupo sa UP-OCTA research team nga alarming ug angay isaka na sa mas istrikto nga quarantine level ang Cagayan de Oro ug Misamis Oriental tungod sa kataas na sa kaso sa bayrus.
Apan miingon ang mayor nga mahimong walay hinungdan ang pagpasaka sa quarantine status kon dili usab balanse ang aksyon nga himoon sa matag-local govt unit.
Una nang nagbaton ang syudad sa 1,068 ka kaso ug sobra 500 na usab anng Misamis Oriental.
Samtang pondo na lamang ang gihulat sa Department of Interior ang Local Government o DILG 10 aron mapabarog ug ma-instular ang dugang nga Temporary and Treament Monitoring Facility dinhi sa syudad ug ubang bahin sa Norther Mindanao.
Mi-angkon si DILG-10 Director Arnel Agabe nga nagka-grabe ang kaso sa local transmission sa COVID-19 sa syudad,busa,namugna sa buhatan ang Resolution no.119 series of 2020 alang niini.
Sa pagkakaron, ang syudad nagbaton na sa 1,068 kinatibuk-ang kaso sa COVID diin 324 ka pasyente ang kasamtangang gi-atiman, kuyog ang libuang closed contact nga anaa sulod sa mga nagkadaiyang city isolation units.
