CAGAYAN DE ORO CITY – Gikonsiderar na sa Dept of Health 10 nga anaa sa high risk status ang syudad tungod sa walay hunong nga pagsaka sa COVID-19 cases.
Kini ang gitaho ni City Health Office head Dra Lorraine Nery kang City Mayor Oscar Moreno sa virtual nga panagtagbo nga gipatawag sa ahensiya kanila sa miaging adlaw.
Miingon si Nery nga tungod kini sa nahuptang 11.65 nga daily attack rate samtang misaka pa ngadto sa 78 porsiento ang bed occupancy rate mismo lamang dinhi sa dakbayan.
Dugtong niini,miapelar usab si DoH- 10 regional director Dr Jose Llacuna sa tanang local govt units nga sama sa Cagayan de Oro nga daghanan pa sa ubang bahin sa rehiyon ang temporary treatment monitoring facilities aron dili magdasok ang mga pasyente sa naka-code red nga Northern Mindanao Medical Center.
Samtang gusto ni DoH 10 regional director Dr Jose Llacuna nga tas-an ang quarantine status nga ipatuman dinhi sa dakbayan.
Kini tungod sa critical status sa mga ospital nga gadawat sa mga pasyente nga nagbaton sa COVID-19.
Miingon si Llacuna nga kabahin sa ilang gihangyo pinaagi sa regional IATF ngadto sa national level nga kon dili mahatag ang escalation status sa modified general community quarantine sa tibuok Northern Mindanao,bisan ang syudad sa Cagayan de Oro na lamang.
Una na usab nagpagawas sa kamanduan si Moreno nga gidili na ang pagtapok-tapok sama sa birthday ug uban pa kay nakit-an nga usa sa pinakapaspas nga tinubdan sa local transmission sa bayrus.
Dugtong niini,giangkon ni NMMC liason officer Dr. Bernard Rocha nga dako’g tabang ang pagdeklara’g General Community Quarantine sa rehiyon.
Kini ilabina nga gitas-an nila ang porsiento sa pagdawat sa mga pasyente nga masulod sa ilang ospital tungod sa paghambin sa grabeng kahimtang sa COVID-1.
Apan giklaro sa maong doktor nga magdepende gihapon kini sa mahimong kooperasyon sa katawhan.
Giklaro ni Rocha nga gadawat man sila sa mga gapa check up apan mas giawhag nila ang katawhan nga moagi na lamang telekonsulta.
