CAGAYAN DE ORO CITY – Mitala na sa 115 ka pasyente nga positibo sa coronavirus disease ang hingpit nga naulian dinhi sa syudad.
Kini human laing tulo ka pasyente ang naka-rekober samtang gipaubos sa medikasyon sulod sa temporary treatment and monitoring facilities o TTMF ning dakbayan.
Miingon si city epidemiologist Dr Joselito Retuya nga may duha lamang ka locally stranded individuals ang nadugang nga positibo sa bayrus kagahapong adlawa.
Dumduman nga ubay-ubay’ng bahin sa Cagayan de Oro City ang nagka-local transmission sa bayrus nga naglakip sa kabarangayan sa Camaman-an,Carmen,Lumbia,Kauswagan,Agusan ug Brgy 35 sukad nakasulod ang bayrus sa Northern Mindana.
Hisayrang subay sa data sa Dept of Health-10,nagbaton na ang rehiyon sa 696 ka kaso sa bayrus diin 177 niini ang direktang gikan dinhi sa syudad.
