CAGAYAN DE ORO CITY – Gihupay ni City Health Officer Dr.Lorraine Nery ang kabalaka sa publiko sa 59-anyos nga pasyente nga ika-14 nga nagpositibo sa Covid-19 diha sa Zone 9, Phase I sa Sitio Macanhan, Brgy Carmen.
Si Nery miingon nga dugay na nilang gipaubos sa isolation ang pasyente ilabina nga silingan kini sa namatay nga 62-years old Covid-19 patient sa maong lugar.
Gani, mapasalamaton si Nery sa ARI ug ILI surveillance team gumikan sa ilang gihimo nga contact tracing hinungdan nga gilayong na-isolate ang pasyente.
Dugtong niini, lugwayan sa duha ka semana ang pag-kordon sa kapulisan sa maong lugar.
Samtang gdid-an ni City Mayor Oscar Moreno nga makaggawas sa ilang panimalay ang mga residente sa Zone 9, Phase I sa Sitio Macanhan, Brgy Carmen ning syudad sulod sa 14 ka adlaw.
Kini taliwala nga gipaubos na sa modified general community quarantine ang syudad sugod kagahapong adlawa.
Gibutyag ni Moreno nga gumikan sa laing pasyente nga nagpositibo sa bayrus sa maong lugar, gidid-an niya ang mga senior citizens ug bata nga moggawas sa ilang tagsa-tagsa ka panimalay.
Siya miingon nga iya nang gipahibalo daan ang Inter Agency Task Force kalabot na sa iyang himoon nga aksyon sa mga barangay nga adunay Coronavirus cases.
