CAGAYAN DE ORO CITY – Nagbaton na sa siyam ka kaso sa omicron variant sa COVID-19 ang dakbayan sugod sa hinapos nga bahin sa Disyembre 2021 ug sa kasamtangang bulan ning tuiga.
Kini ang kompirmasyon ni DoH 10 media relations officer Emiliano Galban Jr nunot sa gilugwa nga specimen results sa Philippine Genome Center gikan sa pipila ka pasyente ning syudad.
Gipasabot ni Galban nga sa maong mga kaso,pipila niini ang returning Filipinos gikan sa abroad ug namugos nga daw wala pa’y local transmission sa omicron ang dakbayan.
Samtang sukwahi sa gisulti sa DoH-10,may lima ka aktuwal nga infected sa omicron variant na ang dakbayan.
Gibutyag ni City Health Office medical officer Dr Ted Yu nga sa siyam ka kaso,pito niini ang gi-tag sa Philippine Genome Center nga taga- dinhi sa syudad.
Apan giklaro ni Yu nga sa upat ka lalaki ug tulo ka babaye nga natakdan sa maong variant,gilayon usab sila na-isolate hangtod nga nag-negatibo na.
Siya miingon nga kasamtangang nagbaton sa residential address ang maong mga pasyente sa Brgy Carmen,Agusan,Kauswagan,Brgy 23 ug tulo gikan sa Consolacion ning syudad.
Dugang sa CHO nga upat sa lima ka infected cases ang gi-retag usab nila sa Laguna,Parañaque City,Ilocos Norte ug Batangas kay igo ra kini sila nanarbaho sa dakong construction company nga nakabase dinhi sa dakbayan.
Sa pikas bahin,wala gikakurat ni City Mayor Oscar Moreno ang pagbaton sa dakbayan sa omicron variant cases.
Miingon ang mayor nga mismo ang katawhan nasayod ug nakasabot nga dugay ra nasudlan sa maong variant ang dakbayan tungod sa sobra kataas sa mga kaso ning tuiga.
Dugang ni Moreno nga nagsilbi na lamang nga ‘formality’ ang datos nga gi-anunsyo sa Philippine Genome Center kabahin sa omicron rason nga angay gyud magpa-bakuna sa ilang proteksyon kadtong mga tawo nga wala pa modawat niini.
