CAGAYAN DE ORO CITY – Mitala na sa siyam ka kompirmadong pasyente sa coronavirus disease ang namatay nga nakabase ning syudad.
Kini human natakdan ang 66 anyos nga lalaki nga taga-Brgy Camaman-an sa bayrus ug namatay samtang gipaubos sa medikasyon sa city hospital sa syudad sa miaging semana.
Miingon si City Health Office epidimiologist Dr Joselito Retuya nga gawas niini,laing usa ka babaye nga maestra nga residente sa Brgy Camaman-an ang positibo usab sa bayrus.
Gibutyag ni Retuya nga laing local transmission pa ang natala gikan sa Brgy Carmen samtang usa returning OFW nga taga-Brgy Kauswagan ning syudad.
Kasamtangang nagbaton sa 210 ka kaso sa bayrus ang syudad apan 63 lamang niini ang aktibo.
Samtang gipaubos ni City Mayor Oscar Moreno sa lockdown ang porsyon sa duha ka brgy diin naggikan ang tulo ka local transmission sa coronavirus ning syudad.
Kini human natala ang duha ka positibong kaso sa Sitio Macapaya ug Sitio Sta Cruz sa Brgy Camaman-an ug Zone 7,Carmen sa dakbayan.
Miingon si Moreno nga unta sundon sa publiko ang minimum health standards kay mibati siya’g kabalaka nga mosaka pa ang ihap sa local infection sa maong bayrus.
