PC:Owner
CAGAYAN DE ORO CITY-Gigahinan sa city council sa 120 milyon pesos nga pondo ang 13-mil ka pamilya o kapin 20-mil ka indibidwal nga apektado sa pagbaha sa bagyong Vinta sa syudad sa miaging semana.
Kini human pormal nang gipaubos sa state of calamity ang dakbayan pinaagi sa gipasar nga ordinansa sa special session sa konseho sa dakbayan.
Miingon si City Vice Mayor Rainer Joaquin ‘Kikang’ Uy nga dili nila igsapayan nga mahimo sila nga ‘over acting’ kay ang importante kanila nga may gihimo ang konseho pagtubag sa kalamidad sa dakbayan.
Samtang ipahimutang sa transitional homes ang mga residente nga kanunay nag-atubang sa bahad sa kalamidad sama sa baha ug landslides dinhi sa syudad.
Kini maoy kabahin sa plano nga gitinguha sa city hall aron kaminusan ang kanunay pagka-biktima sa libuang residente kada-hapak sa kalamidad sama sa bagyong Vinta sa miaging semana.
Gibutyag ni CSWD officer Teddy Sabugaa nga gawas sa alokasyon sa syudad,mahimo usab magamit sa apektadong brgy ang ilang kaugalingong pondo pinaagi sa deklarasyon sa state of calamity.
Gibaha sa bagyong Vinta ang 23 ka brgy sa syudad hinungdan nahikling ang 13-mil ka pamilya sa evacaution centers sa miaging semana.
