CAGAYAN DE ORO CITY – Nahunong ang pagtabang sa pinakauna nga community pantry sa katawhan nga nakabase sa diha sa Pasil,Brgy Kauswagan ning syudad.
Kini human mibati’g kahaldok sa seguridad sa ilang kinabuhi si Kauswagan Community Pantry organizer Rene Principe Jr kay nakadawat sa mga bahad sa kinabuhi ug na red tag nga suporter sila sa CPP-NPA.
Gibutyag ni Principe nga wala sila’y ideya kon kinsa ang utok sa pagpakatag sa printed materials diin nalatid ang pipila ka mensahe nga nag-akusar nga sila tigpaluyo sa mga kalihukan sa mga rebeldeng pundok dinhi sa nasud.
Hinoon,nalipay ra usab kini kay may mga laing organizer na ang nakapatindog sa dugang community pantries dinhi sa dakbayan.
Samtang gikalipay sa municipal officials ang inisyatiba nga paghimog Community Pantry sa Brgy Poblacion,Opol,Misamis Oriental.
Gibutyag ni Opol Mayor Max Seno nga mismo si Poblacion Kapitan Buks Daroy maoy nangulo aron matukod ang pantry nga makatabang dako sa ilang katawhan.
Miingon si Seno nga wala may pondo nga nagahin ang munisipyo sa kalihukan apan giawhag niini ang katawhan modonar usab aron masustiner ang programa
Nagkatag na ang nagkadaiyang pantry dinhi sa rehiyon.
Dugtong usab niini,giawhag sa kadagkuan sa Cagayan de Oro City Police Office ang katawhan nga mokordinar kanila kon ugaling magpahigayon sa Community Pantry aron mahatagan sa seguridad ilabina ang pagtuman sa health protocol.
Gibutyag ni COCPO spokesperson Lt. Col. Joel Nacua nga usa ka maayong programa ang community pantry alang sa pagtabang sa katawhan samtang gisagubang nga pandemya.
Gisaysay ni Nacua nga suportado usab nila ang maong programa.
Samtang gibutyag usab ni PRO-10 spokesperson Capt. Francisco Sabud nga wala sila’y nabantayan nga gipaluyuhan sa komunistang grupo ang community pantry sa rehiyon.
Giawhag lamang ni Sabud ang organizers ug ang katawhanm nga masunod ang health protocol sa maong inisyatiba.
